توصيل مجاني للطلبات أكتر من 150 شيكل

قصتي أنا والتصميم !! لا تُنسى ومليئة بالشغف والتشجيع 😋



قصتي أنا والتصميم !! لا تُنسى ومليئة بالشغف والتشجيع 😋

باسمه ابدأ وعلى بركته ، بحمد ربنا كتير على محبته لي ، وهدايتي إلى سراطه المستقيم ، وأنا هسا بكتب أول موضوع في مدونتي الصغيرة اللي بتمنى تكبر فيكم أعزائي ، حابب أشارككم قصتي أو تجربتي في التصميم وكيف عرفت التصميم وتشجيع لكل حدا عنده فضول بهاد العالم الرائع . 


إذا إنت من الناس اللي بتحب تطور من حالها ؟ فهاد الموضوع كتير مهم إلك ! اقرأه للآخر

من هداكـ الیوم سنة 2010 لما سألوني شو بدك تطلع لما تكبر؟ كنت أحكي بدي اصیر مهندس - دكتور!! بس داخلیاً كان كل تفكیري أجیب كمبیوتر والعب ، ووعدني أبوي أجيب معدل منيح بالمدرسة عشان يجبلي كمبيوتر ، وخلصت السنة وجبت كمبيوتر وبس فتحته متحمس للألعاب ، وأول العاب لعبتهم SEGA وطرزان و Need For Speed والعاب الفلاش ، وطبعاً كان ويندوز XP ويخرب الويندوز كتير


تلـقائیاً صار الشغف یشدني وحســیت اني بــــعالم تاني ! كيف عملو الويندوز ؟ كيف لما تكبس مسطرة بالكيبورد ينط باللعبة ؟ كيف لما تكبس الأسهم يمشي لـ قدام أو لـ ورا !! كيف لما تكبس ع الماوس يطخ مثلاً ؟ كل هاي الأسئلة كنت أضل اسألها وطبعاً مش ملاقيلها جواب ! بعدها تعلمت أعمل فورمات للويندوز ، وصرت أعمل للناس وحسيت حالي محترف ههه كان أيامها برنامج Multimedia Builder وتعلمت أشتغل عليه وأعمل ملفات Autorun وأنسخ سيديهات وفاتح بزنس 😂


بيوم من الأيام شفت عند ابن جيرانا صورته ع سطح المكتب وكاتب عليها ! وطبعاً انا تحمست وحكيتله كيف بتكتب وعلمني ودخيلك وحتى حملني جميلة بالآخر حكالي بتفتح الصورة ع الرسام وبتكتب وبتحفظها ! شوووو اشي هيبة بالنسبة إلي ، روحت البيت عالسريع وفتحت وعملت صورتي وكتبت إسمي وعملت شعاراتي هدول ، بضحكو بس أحلى أيام لأنه برضو كان عندي اهتمام بالأغاني الحصرية ههه وأحط بصمة صوت عليهم ، متل موقع بانيت أول ما عرفناه .



وطبعاً هيك صار الرسام عندي هو برنامج التصميم المفضل لأني بعرفش غيره وبعدين بدي اشي جديد! عرفت إنه في برنامج بالويندوز Movie Maker بعمل فيديوهات ! صرت أمسك صوري وأحط أغنية وأعمل فيديوهات ووضعي لوز ، وبعدها زهقت صرت بدي شي جديد! صرت أروح مقاهي إنترنت او عند أصحاب واشوف مواقع الكترونية ، ومتت الف موتة لحتي أعرف كيف بنعمل موقع؟ زي مثلاً missflora.store شو يعني إشي فخامة ، بس عالفاضي ما حدا بفيدني ، بعدين نسيت كل هالقصص ودخلت توجيهي والتهيت فيه .


بعدين صرت أتعلم وأتعلم وأتعلم واسأل هون وهناك ، صرت أبحث يوتيوب ، وأيامها كان نفسي أمتلك موقع إلكتروني بس مش عارف كيف ، تواصلت مع شب من بيت لحم ، اتفقت معه انه يشتريلي دومين واستضافة ، وحولتله مصاري ، وكنت يومها مش عارف شو أسمي الموقع ؟ سألني شو بدك إسم الموقع حكيتلو بدي ياه geeksdes.com عشاق التصميم ، وطبعاً بعرفش أصمم موقع من الصفر فـ عرفت برنامج إسمه Artisteer بعمل قوالب جاهزة وبترتبها زي ما بدك ، وعملت قالب واشتغلت ع الموقع طبعاً وفشل 😣




بعد ما خلصت توجيهي ، من الطبيعي أكون متشتت ومش عارف شو أدرس أو شو أشتغل 😗 صرت أتخبط بهالدنيا واشتغلت عدة شغلات ، ودخلت جامعة ما كمّلت فيها السنة لأني ما لقيت حالي فيها وحسيت إني بدفع مصاري ع الفاضي ، وقتها قررت أضل أشتغل وأصرف ع حالي .. وجمعت مصاري واشتريت أول لابتوب بحياتي عشان أنزل برامج التصميم واتعلم اكتر واكتر ، ووقتها عملت قناة ع اليوتيوب وبلشت أعمل فيديوهات واغاني حصرية وعملت اكثر من قناة واليوتيوب يسكرلي ياهم ههه بعدين قلت هاد هبل شو بدي بالأغاني بدي أتعلم إشي اسمه موشن جرافيك ، وكانت هاي أول وآخر شي بعمله .



وبعدها بفترة قلت باخد دورة في مجال التصميم أطور من حالي ، ووعدوني بالدورة بالحصول على شهادات دولية ، وللأسف إنضحك علينا وما أخدت شي وكانت الدورة بـ 1000$ يا دوب استفدت منها بـ 200$ ، وخلصتها يا دوب كنت عارف أساسيات التصميم وشو اللغات الي بتبني مواقع الكترونية .

بعد هيك ! قلت طب ليش أنا أدفع مصاري للناس عشان يشترولي دومين او استضافة ، سألت وعرفت إنه بقدر أطلع فيزا كارد من البنك وأشتري شو ما بدي ، وبالفعل طلعت فيزا إنترنت ، وتحمست ورحت اشتريت دومين خاص sheroodesign.com مع ريسلر كامل بقيمة 149$ ع أساس أبيع منه استضافات للناس ، وبنفس لوقت أرفع موقعي وهيك ، بس بعت منه استضافة وحدة تقريباً عوضت خسارتي لأنه برضو مشروعي فشل .


قعدت فترة أتعلم تصميم وبرمجة ويب ع برنامج Brackets عجبني الوان البرنامج وقلت بدي أعتمد هدول الألوان بالموقع الي بدي أصممه 😇 بستمر فترة صغيرة أو كورس معين ، وبعدها برجع لورا! وبيأس ! وبيجيش ع بالي أكمل؟ بعرفش شو الي بصير معي ؟ خوف من المستقبل ؟ وأضل متشتت مش عارف شو أتعلم فوتوشوب ؟ شعارات !! ولا مونتاج فيديو ولا تصوير ولا ثري دي .... وعملت هاد الشعار واعتمدته وصممت موقع ستاتيك (مش تفاعلي) ولما خلصت مدة الاستضافة ما رجعت عملت شي وزهقت وحتى مسحت كل البرامج والملفات الي بتخص الويب ونسيت كل شي وحكمت على حالي بـ الفشل .



صحیح أنا ما درست دكتوراه ولا هندسة ، ولا حتى تصمیم زي ما بحلم 😑 وصلت مرحلة من اليأس ، لآنه أكتر شي بحياتي بحبه مش زابط معي ، أشتغلت بكتير مجالات وكل شغل يختلف عن التاني بدوام كامل 8 ساعات ، وأروح البيت تعبان ، تكون سهرتي مع لابتوبي ، وأسمع من أقرب الناس الي إني مجنون أو مهووس أو مريض أو مدمن ، وآخر شغل بـ شركة أخشاب وقص ومطابخ وغرف نوم ، عشان أطلع مصروفي ، يعني هاد الحكي كله مش وأنا قاعد بالبيت ، لفت انتباهي ماكنة CNC واتمنيت أكون محل الشخص اللي بشتغل عليها! مدير الشركة إنسان رائع وما قصّر معي ، فتحلي المجال أتعلم وأستفيد ، ساعتها حطيتها براسي صرت اسأل وأتعلم وأعرف شو متطلبات الماكنة وكيف طبيعة شغلها وشو البرامج اللازمة وكيف أصلح أي اخطاء بواجهها ، وبفضل االله قدرت أوصل لمستوى یخلیني أثبت حالي بالمجال اللي بحبه ( بشكل عام ) وأكون راضي عن حالي ، لأنه طول عمري بعرف أنا ما جيت ع الدنيا عبث ، جيت عشان أعمل تغيير وأحقق الهدف المطلوب مني ، والنجاح بنظري اله بدایة! مالوش نهاية ، وطموحي أكبر من أي شي بتتخيله ، وفي مقولة عجبتني ودايماً معلقة براسي ، إنه :

 

إرادة التغيير تقتضي إدارة التغيير

اليوم مع بداية سنة 2020 ، قررت أصنع بداية جديدة لحياة جديدة ، وبعرف إني فشلت كتير بعالم الإنترنت ، بس بكل ثقة عملت خطة للتعلم أكثر وأكثر ، وعملت موقع مسفلورا كبداية بكتب فيه بشكل عام عن أي شي بخطر في بالي ، ورح أشتغل واتعب على مشروع المستقبلي متجر مسفلورا ، عشان أثبت لنفسي وللناس شو أهمية انك تعلم حالك لحالك وانك ما تضيع وقتك ع الفاضي ، عشاني وعشان أهلي وربنا يكون راضي عني .

وأنا متأكد انه التوفيق من رب العالمين ، تابعوا مدونتي عشان تشوفو كل شي جديد فيها ،، وإذا بدك تعرف عني أكتر إدخل هون .

تعليق