توصيل مجاني للطلبات أكتر من 150 شيكل

شرح المحفظة الالكترونية JAWWAL PAY ارسال واستقبال الاموال في فلسطين



شرح المحفظة الالكترونية JAWWAL PAY ارسال واستقبال الاموال في فلسطين

 أول شي وقبل ما نبدأ ! رمضان كريم وكل عام وانتو بألف خير

فيديو الشرح وروابط تحميل التطبيق بآخر الموضوع تحت ، اليوم حابب احكيلكم عن تطبيق جوال بي Jawwal Pay واللي رح احكي كيفية التسجيل والسحب والايداع وكل هاي الامور


بطبيعة الحال اذا انت وصلت لهاد الموضوع فإنت أكيد مهتم بالتجارة الالكترونية أو حتى البيع أون لاين أو شغال فري لانسر وبتقدم خدماتك عبر الانترنت 


لهيك بعرف انت كمستخدم للتطبيق ما بهمك غير لب الموضوع والتفاصيل الصغيرة لهيك جمعتلكم كل المعلومات اللي رح تحتاجوها لتعرفو طريقة استخدام التطبيق وبعض الامور اللي يمكن تكون صعبة على بعضكم



ما هو JAWWAL PAY


المحفظة الالكترونية (jawwal pay) ببساطة تطبيق بسهل عليك حركاتك المالية وبريحك من الكاش بتقدر ترسل وتستقبل مصاري داخل فلسطين ومش بحاجة لحساب بنكي ، ومتوفر انجليزي وعربي وللآيفون والأندرويد


طريقة التسجيل


بعد ما تحمل التطبيق وعشان تسجل بالطريقة الصحيحة بتحتاج :


  • صورة هويتك (احفظها بالاستوديو)
  • رقم جوالك (استعد لاستلام رسالة تأكيد)
  • ايميلك الشخصي
  • رمز الدعوة (من صديق مش ضروري بتقدر تعمل تخطي)


  • بعد ما تسجل بالتطبيق بعطوك فترة مؤقتة لمدة شهر ، ولازم تروح على أقرب وكيل في منطقتك عشان تفعل حسابك دائم (من خلال التطبيق بجانب زر الرئيسية في زر الخريطة فوت عليها وشوف مين أقرب مركز عليك) 


    بس تروح عند الوكيل بلزمك فقط صورة هوية والتوقيع على بعض الأوراق



    مميزات وعيوب التطبيق

    بتقدر ترسل مصاري لأي شخص واي شخص بقدر يرسلك

    بتقدر تدفع فواتيرك جوال واتصالات وهاي الامور

    بتقدر تعبي رصيد جوال الك او لغيرك

    بتقدر تحصل على بطاقة ماسترد كارد (على شكل بيانات)

    بتقدر تحصل على بطاقات العاب بليستيشن اكس بوكس نتفلكس


    العيب اللي انا شايفه شخصياً انه api للمتاجر الالكترونية ، ومش مربوط مع حسابك البنكي ، حكيت معهم حسب ما فهمت انه هاي خطوة قادمة وبشتغلو عليها ، يعني عشان الشغلة جديدة انا على تواصل دائم معهم وهاد الموضوع كل ما اعرف معلومة رح احدثه

     

    وهذا رابط التسجيل في بوابة الدفع وهم بتواصلو معك هاتفياً


     


    السحب والإيداع والعمولات

    الايداع بالحساب بكل بساطة بتروح على أقرب وكيل عليك ، عن طريق رقم جوالك أو رمز QR الخاص فيك بتحكيله بدي مثلا 100 شيكل لحسابي ببعتلك من عنده بتستنى شوي توصلك رسالة وتتأكد انه وصلو المصاري على حسابك وهيك بكون جاهز


    السحب نفس الفكرة بتروح على أقرب وكيل بتسحب المبلغ الي بدك ياه مع العلم انه أكتر مبلغ بالشهر 3700 شيكل


    بالنسبة للعمولات الإيداع مجاني اما السحب واحد بالمئة كحد أدنى شيكل وكحد أقصى 5شيكل اما التحويل 0.5% كحد أدنى شيكل وكحد أقصى 5شيكل :D






    تعليق