توصيل مجاني للطلبات أكتر من 150 شيكل

شرح تطبيق المحفظة الالكترونية PalPay Mahfazati الدفع الالكتروني في فلسطين



شرح تطبيق المحفظة الالكترونية PalPay Mahfazati الدفع الالكتروني في فلسطين

فيديو الشرح وروابط تحميل التطبيق بآخر الموضوع تحت ، اليوم حابب احكيلكم عن تطبيق محفظتي من بال بي واللي رح احكي كيفية التسجيل والسحب والايداع وكل هاي الامور

 

بطبيعة الحال اذا انت وصلت لهاد الموضوع فإنت أكيد مهتم بالتجارة الالكترونية أو حتى البيع أون لاين أو شغال فري لانسر وبتقدم خدماتك عبر الانترنت 

 

لهيك بعرف انت كمستخدم للتطبيق ما بهمك غير لب الموضوع والتفاصيل الصغيرة لهيك جمعتلكم كل المعلومات اللي رح تحتاجوها لتعرفو طريقة استخدام التطبيق وبعض الامور اللي يمكن تكون صعبة على بعضكم



ما هو تطبيق Mahfazati Palpay

 

المحفظة الالكترونية (Mahfazati) ببساطة تطبيق بسهل عليك حركاتك المالية وبريحك من الكاش بتقدر ترسل وتستقبل مصاري داخل فلسطين ومش بحاجة لحساب بنكي ، ومتوفر انجليزي وعربي وللآيفون والأندرويد

 

طريقة التسجيل

 

بعد ما تحمل التطبيق وعشان تسجل بالطريقة الصحيحة بتحتاج :

 

صورة هويتك (احفظها بالاستوديو)

رقم جوالك (استعد لاستلام رسالة تأكيد)

ايميلك الشخصي

رمز الدعوة (من صديق مش ضروري بتقدر تعمل تخطي)



بعد ما تسجل بالتطبيق بعطوك فترة مؤقتة لمدة شهر ، ولازم تروح على أقرب وكيل في منطقتك عشان تفعل حسابك دائم (من خلال التطبيق بجانب زر الرئيسية في زر الخريطة فوت عليها وشوف مين أقرب مركز عليك) 

 

بس تروح عند الوكيل بلزمك فقط صورة هوية والتوقيع على بعض الأوراق



مميزات وعيوب التطبيق

بتقدر ترسل مصاري لأي شخص واي شخص بقدر يرسلك

بتقدر تدفع فواتيرك الكهرباء وجوال واتصالات وهاي الامور

بتقدر تعبي رصيد وطنية الك او لغيرك جوال لسه مش متوفر

بتقدر تحصل على بطاقة ماسترد كارد (على شكل بيانات)

بتقدر تحصل على بطاقات العاب بليستيشن اكس بوكس نتفلكس

 

العيب اللي انا شايفه شخصياً انه api للمتاجر الالكترونية ، ومش مربوط مع حسابك البنكي ، حكيت معهم حسب ما فهمت انه هاي خطوة قادمة وبشتغلو عليها ، يعني عشان الشغلة جديدة انا على تواصل دائم معهم وهاد الموضوع كل ما اعرف معلومة رح احدثه

 

السحب والإيداع والعمولات

الايداع بالحساب بكل بساطة بتروح على أقرب وكيل عليك ، عن طريق رقم جوالك أو رمز QR الخاص فيك بتحكيله بدي مثلا 100 شيكل لحسابي ببعتلك من عنده بتستنى شوي توصلك رسالة وتتأكد انه وصلو المصاري على حسابك وهيك بكون جاهز

 

السحب نفس الفكرة بتروح على أقرب وكيل بتسحب المبلغ الي بدك ياه مع العلم انه أكتر مبلغ بالشهر 2000 دولار






تعليق