توصيل مجاني للطلبات أكتر من 150 شيكل




مين أنا ؟

إسمي شريف حمدان (دويكات) ، مُصمم جرافيك على قد حالي ، مواليد 1993 ، فلسطيني الدّم والهُوية ، من نابلس ، من وأنا صغير بحب التخطيط والرسم بالقلم والورقة ، وبعدين ع برنامج الرّسام في الكمبيوتر وبعدين عرفت بعض البرامج الأكثر تطوراً متل الفوتوشوب ، وحبيت مونتاج الفيديو بداية بالـ موفي ميكر ، شوي شوي إلى أدوبي بريمير وآفتر إفكت ، بقضي معظم وقتي مع لابتوبي وبآمن جداً بالتعلّم الذاتي ، وعندي قناة يوتيوب من أفكاري ومونتاجي ، وبتابع الكثير من المواقع العربية والأجنبية اللى بتـهتم بأمور التقنية والتصميم ، لتطوير نفسي وكسب المزيد من المهارات في هذا المجال .

حُلمي أحط بصمتي بهالعالم اللي مالوش حدود ، وبتمنى يعجبك موقعي ، وتكون مواضيع مثيرة للاهتمام ومختلفة

 

شو بحب بالدنيا ؟

بما إنه كل اهتمامي بالحياة بمجال التقنية ، بحب شغلي اولاً لأني بشتغل بشي بحبه ومليان شغف ، بحب الموز بالحليب ، بحب شعار أبل وبحب شركة أدوبي ، بحب الانستغرام ، بحب الشكل السداسي ، وعملة الدولار $ ، بحب من الفنانين عزيز مرقة ، واليوتيوبرز شادي سرور ، ومقدمين البرامج مصطفى حسني ، وبحب من الأسماء ريان إسم ولد ويقين إسم بنت ، ومن الحروف حرف الـ مـ وحرف الـ R ومن الأرقام رقم 8 ... وبحبكم 💜

 

مهاراتي ؟

انا بطبيعة الحال ماخد من كل بستان زهرة ! يعني شغفي واهتمامي كله بما يخص التقنية والتصميم ، بشتغل ع كتير برامج متل : فوتوشوب & اليستريتور أوتوكاد & آرت كام تصميم صفحات الويب مونتاج الفيديو CNC & G-code

 

الدراسة !

في المرحلة الابتدائية درست في مدرسة بسام الشكعة ، بعدها بـ مدرسة قدري طوقان ، وفي المرحلة الثانوية درست في مدرسة نابلس الصناعية ودخلت مجال ولا عمري بحياتي حبيته !! اتعلمت تبريد وتكييف ، بعدها نجحت توجيهي بمعدل 65 % ، بس ما طورت حالي فيها نهائياً .. ودخلت جامعة القدس المفتوحة سنة زمان وهربت منها ههه ما لقيت حالي ، وبعدها بلشت أطور من حالي بمجال التصميم ، وقصتي مع التصميم عمري ما بنساها مليانة مغامرات كتبتها بـ مقالة إذا بتحب تقرأها إدخل هون .

 

شو بشتغل ؟

اشتغلت بأكتر من شركة وأكتر من نوع شغل مثل البناء والمخابز ومصانع التغليف ، وقعدت فترة مُصمم حر بشتغل تصاميم للناس وتي شيرتات ومطبوعات بكافة أنواعها ، حالياً بشتغل بـ شركة خالد هواش وإخوانه للأخشاب والتجارة العامة ( المنطقة الصناعية الشرقية - نابلس ) على ماكنات القص والحفر CNC والديكورات والمطابخ وغرف النوم وما شابه . وآخر شي شكراً لاستقطاع وقتك الثمين بقراءة هذه الأسطر ، وأهلاً وسهلاً ، وإذا عجبك شغلي والمواضيع ما تبخل بـ تعليق زوق متلك ، وأنا مستعد للمساعدة كمان بأي شي بقدر عليه ، وما تنسوني من دعواتكم .